Matrikulazio kanpaina aurreratu du NIZEk: ‘Eskola ereDugarria’

nizeNIZEko Pello Eguren, Ione Urrutia, Aitor Etxarte, Nekane Lasa eta Virginia Jimenez, agerraldia hasi aurretik. IÑIGO URIZ / ARP

2014-12-17 / Edurne Elizondo

NIZE Nafarroako Ikastetxeetako Zuzendaritzakideen Elkarteak otsailean espero du zabaltzea hurrengo ikasturterako aurrematrikulazioa egiteko epea. Nafarroako Gobernuak ez du data zehaztu, oraindik, baina D ereduaren aldeko mezua zabaldu nahi izan du jada NIZEk: irribarre bat irudikatzen duen D hizkia hautatu du bere marka gisa; Eskola ereDugarria esaldia da, berriz, leloa.

«Gurasoak hasi dira informazioa eskatzen; ikastetxea hautatzea erabaki garrantzitsua da, eta gurasoak goiz hasten dira gaiarekin kezkatzen», azaldu zuen NIZEko Ione Urrutiak, atzo, elkarteak egindako agerraldian. Kezka horiek argitu, eta informazioa gurasoen esku jartzeko asmoz, martxan jarri dute haien kanpaina. «Konfiantzazko eredua da gurea; hurbila eta kalitatezkoa; behar dituzten gaitasunen jabe dira gure ikasleak; eskola irekia eta publikoa da euskarazkoa», erran zuen Antsoaingo Ezkaba ikastetxeko arduradunak. Urrutiak erantsi zuen «sendotzen eta hazten» doala D eredua. Gaur egun, 11.500 ikasle inguru ari dira D ereduan Nafarroan; eta haiekin 1.100 irakasle baino gehiago ari dira lanean.

Egiten duten lanaren berri emateko, hain zuzen, bi bideo labur prestatu ditu NIZEk, D ereduaren alde. «Lan horien bidez azaldu nahi ditugu gure hiru ezaugarri nagusiak: hurbilekoak garela; gure ikasleek hiru hizkuntzatan aritzeko gaitasuna dutela; eta hizkuntzen esparruan inork baino esperientzia handiagoa dugula, murgiltze eredua gurean sortu eta hazi baita», erran zuen San Frantzisko ikastetxeko Nekane Lasak.

Lege aldaketa

Euskararen Legea aldatzeko aukera aipatu zuen NIZEko kide eta Hegoaldeko zuzendari Aitor Etxartek, bertzalde, atzoko agerraldian. «Ez dakigu aldaketa hurrengo ikasturterako prest izanen ote den; edozein modutan, D eredua zabaltzea berri garrantzitsua da, nahikoa ez den arren», erran zuen. Hezkuntzako eta euskalgintzako eragileekin lanean jarraituko dutela erantsi zuen NIZEko kideak. Etxartek onartu zuen, dena den, legea aldatzeko aukerak «ustekabean» harrapatu dituela.

KORRIKA 2015

EUSKAHALDUNDU!

IMG_270130122584727

“Herri hau euskaraz pentsatuko dugu, edo ez da izanen” zioen Amets Arzallusek Korrika 18ren amaieran, Baionan. “Herri hau euskaraz pentsatzen ahal dugu, edo ezin dugu pentsatu”, berretsiko genuke orain: euskahaldundu gaitezen.

Euskal Herria euskalduntzeko norberaren eta taldearen ahalmenean sinetsi eta erabil dezagun ahalmen hori. Ahaldundu gaitezen Euskararen eta euskalgintzaren egoeraz. Batu ditzagun nire, zure, haren ahalegin pertsonalak eta biderka dezagun gure ahalmena auzolanean. Egin dezagun eta eragin. Eta egin eragin.

Euskaldun eta euskaltzale guztiok osatzen dugu Euskal Herria, Euskararen Herria. Eta horixe aldarrikatu nahi dugu: guztion artean, auzolanean eta elkarlanean, lortu ahal dugula euskaraz biziko den herria, euskalakariz osatutako herria. Herri honek auzolanean eta elkarlanean lorpen handiak egin ditu -Korrika bera, esaterako- eta iraganean bezala gaur egun ere eskuzabala eta ahaltsua dela frogatuko du. Hori da Korrikaren eta AEKren nahia.

Eta nahia ahala da. Ahalmen pertsonala eta kolektiboa: norbanakook auzolanean zein erakundeekin eta instituzioekin batera elkarlanean. Dakienak erabiltzeko eta ez dakienak ikasteko ahala; ikasteko eta erabiltzeko eskubidea bermatzeko ahala; euskaltegiak ikaslez betetzeko ahala; euskal kultura hedatzeko eta euskal hedabideak aupatzeko ahala; euskara taldeak laguntzeko eta euskalgintza babesteko ahala…

Korrika 19k ahalmen metaketa izan nahi du, eduki ahal du. Bide berrien abiapuntu. Gutako bakoitzaren eta gu guztion nahiak eta ahalak, auzolanak eta elkarlanak eragingo baitu Euskal Herria, benetan, Euskararen Herria izatea.IMG_269969389180205

XABIER DIAZ ESARTE

“GURE” Xabier
Han hemenka ibili zen zenbait urteetan; hasieran, gutako asko bezala, Udal Ikastolako hainbat egoitzetan, gero “Fuerte Principe” edo Hegoalden zenbait urte, Axularren ere, baina, azkenean, gurean, Amaiur Ikastolan eta, horregatik, GURE Xabier.
Eta, orain, “jubiloa” , bizipoza, alaitasuna, hartu berri du, “o sea” erretreta hartu duela, jubilatu.
Errazago  eta motzagoa izango litzateke kontatzea, gurean, Ikastolan, zer ez duen egin, egin duena baino: arte irakaslea, aspalditik, baino ez beti, musika, antzerki, gaztelera eta laguntza irakaslea ere, ikasturtero kontzertu parea, bi antzerki muntaiak, eta hainbat emanaldien antolatzailea, bere aholku interesgarri eta profesionalak ebaluazio bileretan beti emateko prest, gure himnoaren bultzatzaile eta zabaltzailea, sindikalista, poeta, txistulari, haurrentzako antzerki liburuen idazlea, egunkarietako zutabegile….. Eta azken urteetan, olentzeroa ere.
Atsedena hartu, merezi duzu eta…. disfruta ezazu, txakurra paseatzen,  edo “bueltika” bat ematen bai Iturrama eta Iruñean zehar, baita Zaraitzuko larreetan lagun artean eta, amaierako beti importanteena, hoberena, zure Zelaida eta Jasule zaindu, maitatu eta mimatu…
Bejondeizula!!Pello Eguren.
Amaiur Ikastolako Zuzendaria